Sunday, November 14, 2010

ပုံပြင်

တစ်ခါက အရက်အမြဲမူးပြီး မောင်းတဲ့ ကား ဒရိုင်ဘာ တစ်ယောက်နဲ့ ဓမ္မကထိက ဆရာတော်တစ်ပါး ကားစီးသွားကြသတဲ့။ ဒရိုင်ဘာက အမူးလွန်ပြီး မောင်းတော့ ကားမှောက်ပြီး နှစ်ဦးစလုံး သေသွားကြတယ်တဲ့။ သေသွားတော့ သူတို့ကို ငရဲပြည်က ယမမင်းဆီရောက်သွားတာပေါ့။

ပထမဦးဆုံး ဓမ္မကထိကဆရာတော်က ယမမင်းထံမှာ အရင်အစစ်ခံတယ်တဲ့။ သူကတော့ လူ့ပြည်မှာ တရားတွေဟောတဲ့ ဘုန်းကြီးဆိုတော့ ကောင်းတဲ့ ဘုံရောက်မှာပဲ ဆိုတဲ့ အတွေးနဲ့ ပြုံးပြုံးလေး ယမမင်းရဲ့ အခန်းထဲဝင်သွားတယ်တဲ့။ သူ့နောက်ကတော့ အရက်မူးတဲ့ ဒရိုင်ဘာက ကုပ်ချောင်းကုပ်ချောင်းနဲ့ ယမမင်းကို ကြောက်ကြောက်လန့်လန့်နဲ့ အသာလေး ဓမ္မကထိကနောက်မှာ ရပ်နေတယ်တဲ့။

ယမမင်းကြီးက ပထမ၀င်လာတဲ့ ဓမ္မကထိကကို မေးတယ်တဲ့။
အသင်လူ့ပြည်မှာ ဘာလုပ်ခဲ့တုံး ဆိုတော့ ဓမ္မကထိက ကရင်ကော့ပြီး သူလူ့ဘ၀တုံးက ဓမ္မကထိကလုပ်ခဲ့တဲ့အကြောင်းပြန်ဖြေတယ်တဲ့။ အဲတော့ ယမမင်းကြီးက ဒါဆို အသင် ငရဲကျခံစေဆိုပြီး အမိန့်ချလိုက်တယ်။ ဓမ္မထိကလည်း မကျေနပ်တော့ ယမမင်းကို ပြန်ပြောတယ်တဲ့။ ယမမင်းကြီး တစ်ခုခုတော့ မှားနေပြီထင်တယ်လို့ ဆိုတော့ ယမမင်းကြီးက သင်လူ့ဘ၀တုံးက ဓမ္မကထိက လုပ်ခဲ့တယ်ဆိုရင် ကျွန်ုပ်ရဲ့ ဆုံးဖြတ်ချက်မမှားပါဘူးဆိုပြီး ပြန်ပြောတယ်တဲ့။ ဒါနဲ့ ဓမ္မကထိကလည်း သူ့နောက်က အရက်မူးဒရိုင်ဘာကို ဘယ်လိုအမိန့်ချမလဲဆိုပြီး စောင့်ကြည့်လိုက်ဦးမယ်ဆိုပြီး ဘေးမှာ ဘာမှထပ်မပြောတော့ပဲ ရပ်ပြီး ကြည့်နေတယ်တဲ့။

ယမမင်းက ထုံးစံအတိုင်း အမူးသမားကိုမေးတာပေါ့ ။ လူ့ဘ၀တုံးက ဘာလုပ်ခဲ့သလဲ ဆိုပြီးတော့ပေါ့။ အမူးသမားလည်း မလိမ်ဘဲ အမှန်အတိုင်းပဲ အရက်မူးပြီး ကားမောင်းတဲ့အကြောင်းပြောပြတာပေါ့။
အဲတော့ ယမမင်းကြီးက ဟာ.. ဒါဆို နတ်ပြည်တက်စေဆိုပြီး အမိန့်ချတယ်တဲ့။

ဆိုတော့ ဘေးမှာရပ်နေတဲ့ ဓမ္မကထိက က၀င်ပြီး ကန့်ကွက်တယ်တဲ့။ ယမမင်းကြီး မတရားဘူးပေါ့ဗျာ။
လူ့ပြည်မှာ လူတွေအသိတရားရအောင် ဆောင်ရွက်ခဲ့တဲ့ သူကျတော့ ငရဲခံရပြီး အရက်မူးသမားဒရိုင်ဘာကိုကျတော့ နတ်ပြည်မှာစံရတယ်ဆိုပြီးတော့ ထချဲတော့တာပေါ့။

ဒီတော့ ယမမင်းက သူဆုံးဖြတ်တာတစ်ခါမှ အမှားအယွင်းမရှိခဲ့တဲ့အကြောင်း အခုလည်း သူဘာကြောင့် ဒီလိုဆုံးဖြတ်ရသလဲဆိုတာ ရှင်းပြမယ်ဆိုပြီး ရှင်းပြတယ်တဲ့။

ပထမ ဓမ္မကထိကဆရာတော်ကတော့ လူတွေအသိရအောင်ဆိုပြီး တရားဟောတာပါပဲ ဒါပေမယ့် ဟောတဲ့တရားက လူတွေနားမလည်ပဲ သူသိတဲ့ ဘုရားစာ(ပါဠိ)တွေပဲ (နှစ်နာရီ-သုံးနာရီ) ရွတ်သွားတော့ တရားနာတဲ့ ပရိသတ်က တရားမရပဲ ငိုက်မျဉ်းကုန်ကြတယ်။ ငိုက်မျဉ်းတယ်ဆိုတာ ထိနမိဒ္ဓ ကိလေသာ ဖြစ်တဲ့အတွက် လူတွေကို အကုသိုလ်တွေပဲတိုးပွားစေတယ်။ ဒါကြောင့် ငရဲကျစေဆိုပြီး အမိန့်ချတာပါတဲ့။

အဲ.. အမူးသမားဒရိုင်ဘာကတော့ အရက်မူးပြီး ကားကိုတရားမောင်းတော့ နောက်ကစီးနင်းလိုက်ပါတဲ့ ခရီးသည်တွေက ကြောက်လန့် ပြီး ရသမျှ ဘုရားစာ၊ သဗ္မုဒ္ဓေ၊ ဂုဏ်တော်တွေ ရွတ်ပြီး လိုက်ကြရသတဲ့။ ဒါ့ကြောင့် လူအများ ကုသိုလ်တိုးပွားစေပါတယ်။ ဒါကြောင့် နတ်ပြည်ပို့ရတာပါတဲ့... ကဲ...မှတ်ကရော။။


တခလမှ တရားပွဲတွင် အရှင်ဇ၀န(မေတ္တာရှင်)ဆရာတော်ပြောပြတဲ့ ဟာသပုံပြင်လေးပါ။ :)

2 Comments:

At November 14, 2010 at 5:48 AM , Anonymous ဝက်ဝံလေး said...

ဟိ ပုံပြင်လာဖတ်တယ်နော်
ပျောက်နေတာ တော်တော်ကြာပေါ့
နေကောင်းလား သမီးတွေရော တော်တော်ကြီးဘီလား နာ့ကို သီချင်း ဆိုပြဦးလို့ ခစ်ခစ်

 
At November 29, 2010 at 4:37 AM , Blogger Unknown said...

ကောင်းပါ၏

 

Post a Comment

Subscribe to Post Comments [Atom]

<< Home