Thursday, September 24, 2009

အတွေးစကားတချို့

အသက် ၃၄ နှစ်ရှိပီဖြစ်တဲ့ သူတစ်ယောက်ရဲ့  အတွေးစကားလေတွေပါ။ အဲဒီသူရဲ့ တသက်တာ ၃၄နှစ်တာ

ကာလမှာ ဖြတ်သန်းခဲ့ရတဲ့ အတွေ့အကြုံ တွေပေါ်မှာ သူမြင်လာခဲ့တဲ့ အတွေးအမြင်တွေလို့ ပြောရင်လည်း ရပါတယ်။ သက်တမ်း တစ်ခုမှာ ဘ၀ပေါင်းများစွာကို ဖြတ်သန်းခဲ့ရတာကို သတိပြုမိရင် ကံရဲ့ ဆန်းကြယ်မှုတွေကို သတိပြု မြင်နိုင်ပါတယ်။
အချိန်တွေပြောင်းနေတာနှင့်အမျှ ဘဝေတွေပြောင်းနေပါတယ်။ အမိဝမ်းထဲကဘ၀၊ မွေးကင်းစဘ၀မှသည်

ယနေ့အချိန်အခါကာလအတွင်းမှာ ဘ၀တွေဟာ နိမ့်လိုက်မြင့်လိုက် ဆင်းလိုက်တက်လိုက်နဲ့ ကံနိမ့်ကံမြင့်တွေရဲ့ အကျိုးပေးရာတွေကို ရင်ဆိုင်ဖြတ်သန်းခဲ့ကြရပါတယ်။
ဒီလို ဘ၀ တစ်ဆစ်ချိုး အကွေ့တွေမှာ လဲကျသူများ၊ ထောင်မတ်လာသူများ ရှိကြပါတယ်။ လဲကျသူများက

ပြန်လည်ထူမတ် ဆက်လက်လျှောက်လှမ်းဖို့ အားအင်တွေလိုသလို၊ ထောင်မတ်လာသူများကလည်း မတိမ်းမစောင်းအောင် ထိန်းသိမ်းတတ်ဖို့လိုပါတယ်။
ဘ၀ခရီးကို လျှောက်လှမ်းရာမှာ မိမိတို့ရဲ့ စိတ်စေတနာတွေက အချိန်နဲ့အမျှ အမျိုးမျိုးပြောင်းလဲ နေတာနဲ့အမျှ စေတနာရဲ့ အကျိုးတူဘ၀တွေရကြ ရမှာပါ။ ဒါကိုပဲ ကံရဲ့ ဆန်းကြယ်မှုလို့ခေါ်တာပါပဲ။
 အမှန်က ကိုယ်စိတ်ရဲ့ ဆန်းကြယ်မှုပါပဲ။ အဲဒီဆန်းကြယ်တဲ့စိတ် အပြောင်းလဲမြန်တဲ့စိတ်ကို
 အရွယ်နဲ့လိုက်ပြီး တိုးတက်မြင့်မားအောင် ပြောင်းပေးနိုင်ရင် အလုပ်အကိုင်၊ စီးပွားရေး၊ လူမှုရေးတွေနဲ့ အစစအရာရာမှာ အဖက်ဖက်က တိုးတက်မျာ သေချာပါတယ်။

ဒါကိုပဲ ကံကောင်းတယ်လို့ပြောကြတာပါပဲ။
ကံဆိုတာ စေတနာကို ပြောတာပါ။ စေတနာဟံ ဘိက္ခဝေ ကမ္မံဝဒါမိ လို့ ဘုရားဟောပါတယ်။ စေတနာကိုပင်လျှင် ကံဟု ငါဘုရားဟော၏ လို့ အဓိပ္ပါယ်ရပါတယ်။ ဒါကြောင့် စေတနာကောင်းရင် ကံကောင်းမယ်၊ ဘ၀တွေကောင်းမယ်။ တိုးတက်မယ်။ စေတနာဆိုးရင် ကံဆိုးလို့ ဘ၀တွေ တိမ်းစောင်းဆုတ်ယုတ်မယ်။
ဒီစိတ်စေတနာ အမျိုးမျိုးပြောင်းလဲလို့ ဘ၀မှာ ပျော်ရွှင်မှုတွေ၊ ငိုကြွေးမှုတွေ၊ ရယ်မောရတာတွေ၊

လွမ်းဆွေးရတာတွေ ၊ အားတက်စရာတွေ၊ ငေးငိုင်ရတာတွေ အမျိုးမျိုးကြုံကြရပါတယ်။ ကောင်းတာကိုကြုံလို့ မလွမ်းလောက်ပေမယ့် ဆိုးတာကိုကြုံရင်တော့ မောလောက်ပါတယ်။ ဒါကြောင့် သူ့ရဲ့ စကား (၃၄) ခွန်းထဲက

နှစ်သက်မိတာလေးတွေကို မျှဝေလိုက်ပါတယ်။

၁။ သေချာတယ်
သင်......
ဘယ်အရာကိုမှ မျှော်လင့်ကြီးစွာ မထားပါနဲ့။
သင့်အတွက်
အသေချာဆုံးကတော့.... သေခြင်းပါ။

၂။ ကြိုက်ရာရွေးပါ
လောကဓံကို မခံနိုင်ရင်
လောကရဲ့ဒဏ်ကို ခံရမှာဘဲ။

၃။ပေါင်းသာပေါင်း
ဒုက္ခဟာ သတ္တ၀ါတွေအတွက်
အကောင်းဆုံးမိတ်ဆွေဘဲ။
ဒုက္ခနဲ့ များများပေါင်းမှ
သုခဆိုတာ ခိုင်မြဲတာ။
ဒုက္ခနဲ့မပေါင်းချင်ရင်
သုခဆိုတာ ရောက်မလာနိုင်ဘူး။

၎။ ၀မ်းနည်းစရာ
ဗျသန(ပျက်စီးခြင်း)တရား (၅)မျိုးမှာ...
ဆွေမျိုးတွေပျက်စီးတာ၊ စီးပွားဥစ္စာပျက်စီးတာ၊ ရောဂါဖြစ်တာ ဒါတွေက သဘာဝပျက်စီးခြင်းတွေ။
ဘယ်သူမှရှောင်လို့မရဘူး။
ဒီပျက်စီးမှုတွေကြောင့် အပါယ်လည်းမရောက်သလို နိဗ္ဗာန်နဲ့လည်း ဝေးမသွားပါဘူး ။
ဒါကြောင့် ၀မ်းနည်းစရာ ငိုစရာမလိုဘူး။
သီလပျက်စီးခြင်း၊ အယူပျက်စီးခြင်းကတော့ ကိုယ်အသုံးမကျလို့ဖြစ်တာ။
ဒီနှစ်မျိုးပျက်စီးရင် အပါယ်ကနေ ခေါင်းဖေါ်နိုင်မှာမဟုတ်သလို တိုင်းပြည်နဲ့ လူမျိုးလည်း မတိုးတက်ဘူး။
ဒါကြောင့် ဒီနှစ်မျိုးပျက်စီးရင် ၀မ်းနည်းစရာပဲ။

၅။ ရှာပါ
ဒါနရှိမှ ဓနရှိမှာ
လူတွေက လွဲနေတာ
ဒါနမရှာပဲ ဓနချည်းပဲ ရှာနေတော့
ဖတ်ဖတ်သာမောရော။

၆။ ကျောခြင်းကပ်မှာရှိတယ်
အချစ်နဲ့ အပြစ်ဆိုတာ
သုံးနဲ့ လေးလိုဘဲ၊
ဘယ်တော့မှ မျက်နှာချင်းဆိုင်မနေဘူး။

၇။ အကောင်းဆုံး
ရှုံးရှုံး နိုင်နိုင်
ဘယ်ဟာမှ မကောင်းဘူး၊
အကောင်းဆုံးကတော့
မပြိုင်ပဲနေတာဘဲ။

၈။ စီးဆင်းပါ
စီးပွားဆိုတာ
စီးဆင်းသွားမှ ပွားတာ။
မစီးဆင်းပဲ ပိတ်ထားရင်
မပွားတော့ဘူး။

၉။ ကျော်မကောင်း ကြားမကောင်း
ကျော်ဖို့ထက်
ကောင်းဖို့ အရေးကြီးပါတယ်။
ကျော်ပြီး မကောင်းရင်
ကြားလို့လည်း မကောင်းပါဘူး။


ကျန်တာတွေ ကို ဆက်လက် အလျဉ်းသင့်သလို ဖေါ်ပြပေးပါမည်။

အရှင်အဂ္ဂဉာဏ(ဇေယျာရွှေပြည်) ၏ ၃၄ အတွေးစကား မှ ထုတ်နှုတ်တင်ပြပါသည်။

2 Comments:

At September 27, 2009 at 1:22 AM , Blogger ဝက်ဝံလေး said...

ဟယ် ကောင်းတယ် အဓိပ္ပါယ်ရှိတဲ့ စကားလေးတွေပဲ ဟ ငါ မှတ်သွားတယ် သိလား ခေါင်းထဲရောက်လားမရောက်လားတော့ ငါလဲမသိဘူးဟယ်

 
At November 29, 2010 at 4:15 AM , Blogger Aeimt Kabyar Mon said...

ကောင်းလိုက်တာရှင်

 

Post a Comment

Subscribe to Post Comments [Atom]

<< Home